Академия
жаңалықтары

8 желтоқсан күні Академияда су, энергетика және азық-түлік ресурстарын басқарудағы Нексус тәсілі (ойын) бойынша тренинг өтті. Тренингті Академия су ресурстары және қоршаған орта жөніндегі USAID Өңірлік жобасымен бірлесіп өңірдің тұрақты дамуына қол жеткізу мақсатында ұйымдастырды.

Шара мемлекеттік қызметшілердің басқару дағдыларын арттыру мақсатында Академияның білім беру процесіне Нексус тәсілдерін сәтті интеграциялау үшін білім беру мақсатында өткізілді.

Интерактивті симуляцияны Еуропалық Одақтың тапсырысы бойынша поляктардың «Жүйелік шешімдер орталығы» ұйымы әзірледі. Бұл елдер мен аймақтар арасындағы су, энергетика және азық-түлік ресурстарын басқарудың 5 түрлі сценарийін ойнаудың жеңілдетілген процесі.

Ойында әрбір қатысушы өзіне тиесілі рөлді алды және өз секторының мәселелерін қорғауды ғана емес, басқа қатысушыларды тыңдауды, өз ұсыныстарын дәлелдеуді және келісімге келуді үйренді. Симуляциялық ойын орташа есеппен 4-5 сағат өтті. Үстел картасын, түрлі-түсті чиптерді және карталарды пайдалану арқылы жүзеге асырылды.

2023 жылдың 4 желтоқсанынан бастап Академияның Абай облысы бойынша филиалының директоры лауазымына ӘСЕТ ТАЛҒАТБЕКҰЛЫ АБЖАҚОВ тағайындалды.

Әсет Талғатбекұлы бірнеше жыл бойы Академияның орталық аппаратында қызмет еткен және осы уақытқа дейін Батыс Қазақстан облысы бойынша филиалының директоры қызметін атқарған.

Әсет мырзаға жаңа лауазымда сізге мол табыс, береке тілейміз! Абай облысы филиалының жұмысын жақсарту жолында еңбегіңіз жемісті болсын!

Атап өтейік, Академияның Абай облысындағы филиалы 2022 жылдың соңында құрылған, 2023 жылдың сәуір айында филиалға ғимарат бөлініп, өңірдегі мемлекеттік қызметшілердің біліктілігін арттыру, білімін жетілдіру бағытында қызмет ете бастады.

Қазақстан Республикасы Президентінің жанындағы Мемлекеттік басқару Академиясы мен Түркия Республикасы Президентінің жанындағы Адам ресурстарын басқару жөніндегі офис арасындағы ынтымақтастық туралы меморандум аясында мемлекеттік қызметшілері тәжірибе алмасу және біліктілігін арттыру мақсатында Түркияға тағылымдамаға барып келді. 5 күндік тағылымдамаға Солтүстік Қазақстан облысынан Академия филиалының директоры Лаура Советқызының жетекшілігімен 7 мемлекеттік қызметші және Павлодар облысынан 3 маман қатысты.

Тағылымдама бағдарламасына сай делегация HR Кеңсесінің қызметімен, цифрлық жүйені пайдалана отырып Түркияның адами ресурстарды басқару саласындағы тәжірибесімен танысты. Министрліктер мен ведомстволық бағынысты ұйымдарда, Анкара және Каппадокия қалаларының әкімдерімен бірқатар кездесулер өткізілді. Тағылымдама нәтижесі бойынша ортақ іс-шаралар және Мемлекеттік қызмет саласындағы жобаларды іске асыру туралы келісілді.

Айта кетейік, жақында Мемлекеттік қызмет істері агенттігінің төрағасы Дархан Жазықбай Түркия Республикасы Президентінің жанындағы Адами ресурстарды басқару офисінің Президенті Салим Атайдың шақыруымен Анкара қаласына іссапармен барып, нәтижесінде «Персоналды басқарудың цифрлық жүйелері туралы ТМҰ-ға мүше мемлекеттердің тиісті институттары арасындағы өзара түсіністік туралы меморандумға» қол қойылған еді.

Екіжақты кездесуде ҚР Президенті жанындағы Мемлекеттік басқару академиясы мен Түркия Республикасы Президентінің жанындағы Адам ресурстарын басқару офисі арасындағы меморандум аясында мемлекеттік қызметшілерді тағылымдамадан өткізу, магистранттар үшін HR бойынша қос дипломдық бағдарламаны енгізу және ғылыми зерттеулер жүргізу бойынша бұрын жасалған келісімді іске асыру мәселелері талқыланды.

30 қараша күні Академия ректоры Ерлан Әбіл іссапармен Шымкент қаласына барды.

Ерлан Қуанышұлы Академияның Шымкент қаласы бойынша филиалының қызметкерлерімен, МҚІА аумақтық департаментінің өкілдерімен және жас мемлекеттік қызметшілер мектебінің мүшелерімен кездесу өткізді. Жиында ректор Академияның саясаты, құндылықтары, стратегиялық жоспарлары жайлы айтты.

Сонымен қатар іссапар аясында филиал ғимаратындағы мемлекеттік қызмет мұражайының ашылу салтанатына қатысты. Мұражайдың ашылуына Қазақстан Республикасы Сот әкімшілігінің Шымкент қаласы бойынша департаменті баспасөз қызметінің іс жүргізу бойынша инспекторы Қ.Т. Дүйсенби, Қазақстан Республикасы Мемлекеттік қызмет агенттігінің Шымкент қаласы бойынша департамент басшысы Ш.А. Сұлтанхан, Шымкент қаласы әкімдігінің Ішкі саясат және жастар істері жөніндегі  басқарма басшысы Б.А. Өнербаев, филиалда ұзақ уақыт қызмет атқарған ардагер зейнеткер Б.М. Ешмуратова, жас мемлекеттік қызметшілер мектебінің мүшелері, Шымкент қаласы «Оқушылар үйінің» тәрбиеленушілері, департамент және академия филиалының қызметшілері қатысты.

Академия филиалында мұражай ҚР Мемлекеттік қызмет істері агенттігінің төрағасы Д.Жазықбайдың тапсырмасы аясында ашылды. Ректор құттықтау сөзінде мұражайдың ұрпақтар сабақтастығын жалғайтынына, жас мемлекеттік қызметшілерге берері көп екеніне тоқталды.

Ал Шымкент қаласы әкімдігінің Ішкі саясат және жастар істері жөніндегі басқарма басшысы Бахтияр Өнербаев: «Мұражай өскелең ұрпақтың санасында өткенге деген құрмет пен болашақты тануға бағдар беретін теңдессіз дүние. Жастар бойында елге қызмет етудің үлгісін дәріптейтін құралдардың бірі», – деп атап өтті.

Шымкент қаласы «Оқушылар үйінің» бір топ тәрбиеленушісі суреттерінде болашақ мемлекеттік қызметші бейнесін қалай көретінін бейнелеп, байқауға қатысты және олардың жұмыстары мұражайға тапсырылды.

Іссапар аясында Ерлан Қуанышұлы Жастар ресурстық орталығында «Қоғамдағы жастардың рөлі» тақырыбында өткен кездесуде Шымкент қаласы жастарымен жүздесті. Өз сөзінде мемлекеттік аппаратты кәсібилендіруде жастар өз үлестерін қосатынына сенім білдірді.

1-3 желтоқсан аралығында Академия қызметкерлері III Ұлттық ректорлар мектебі жобасы аясында «Университеттердің жаңа модельдері. Version 5.0.» тақырыбындағы семинарға қатысты.

Шара барысында жоғары білім беруді дамыту мәселелері, жаһандану жағдайында жоғары оқу орындарын басқару мен құрудың жаңа тәсілдері талқыланды.

Семинарға еліміздің жетекші жоғары оқу орындарының ректорлары, проректорлары, жоғары білім беру саласындағы сарапшылар қатысты.

«Даму күні» аясында Академияда «Дода» зияткерлік ойынының ІІ кезеңі өтті. Тілдік құзыреттілікті дамыту кабинетінің ұйымдастыруымен өткен сайысқа (Басқару институтының «МРР-22» (2 курс) және «MHRM-23», «МRD-23» (1 курс) мамандығы магистранттарынан құралған) «Тұран» және «Жалын» командалары қатысты. Ойынды Басқару институты «Өңірлік даму – 23» мамандығының магистранты Нұрберген Бекеев жүргізді. Қатысушылардың ойынына Дипломатия институтының ассистенті Бауыржан Бағлай және Басқару институтының магистранты Анар Қалимұратова төреші болды. Нәтижесінде тапқырлықтары мен білімдері басымырақ болған «Жалын» командасы ойынның жеңімпазы атанды. Жеңімпаз команда келесі ІІІ ақтық кезеңде «Ұшқын» командасымен «білім додасына» түсетін болады.

ЭКОНОМИСТ+ «ӨЗЕКТІ ЭКОНОМИКАЛЫҚ МӘСЕЛЕЛЕР»  тақырыбында  Қазақстандық әлеуметтік зерттеулер институтының атқарушы директоры Азиз Ержанұлы Искаковпен және орынбасары, Ұлттық инновациялар және кәсіпкерлік орталығының жетекші ғылыми қызметкері Дана Акылбекқвзв Ешимовамен кездесу өтті.

Профессор-оқытушылар құрамына арналған «Эссе және policy brief жазудағы әдіснамалық тәсілдер» тақырыбында кезекті әдістемелік семинар өткізілді. Семинар барысында профессорлар Мемлекеттік саясаттың ұлттық мектебі профессорының м.а. С.А. Джаненова және  Мемлекеттік саясаттың ұлттық мектебінің доценті Г.А. Мақұлбаева сабақ жүргізгенде қолданатын өз тәжірибелерімен және әдіснамалық тәсілдерімен бөлісті, атап айтқанда: аssessment rubric, structure of the essay, feedback to students, content organization, critical thinking, grammar, format, citation style (in-text, references). Семинар сабақ өткізу барысында әдістемелік және тәжірибелік тәсілдерді қолдану бойынша тәжірибе алмасу, оқытудың сапасын жақсарту, оның деңгейін көтеру үшін халықаралық тәжірибені пайдалану және оқу үдерісіне инновациялық технологияларды енгізу мақсатында ұйымдастырылды.

A to Z Decisions Қазақстан бас директоры Зулпат Азиева онлайн форматта «ИННОВАЦИЯЛАРДЫ СТРАТЕГИЯЛЫҚ БАСҚАРУ ЖӘНЕ ISO 56002-мен ТАНЫСТЫРУ» тақырыбында дәріс оқыды.

Академияға Қазақстан Республикасына еңбек сіңірген спорт шебері Илья Ильин келіп, магистранттармен және докторанттармен спорттағы қалыптасу жолымен, тәжірибесімен бөлісті.

Басқару институтының докторанты Ерболат Мұхтарұлының ұйымдастыруымен НЕ? ҚАЙДА? ҚАШАН? интеллектуалды ойыны өтті.

ҚР Сыбайлас жемқорлыққа қарсы іс-қимыл Агенттігінің Астана қаласы      департаментінің превенция басқармасының аса маңызды істер жөніндегі офицері Алмагүл Ерсінқызы Кемелбаева «СЫБАЙЛАС ЖЕМҚОРЛЫҚҚА ҚАРСЫ МӘДЕНИЕТТІ ҚАЛЫПТАСТЫРУ» тақырыбында білім алушыларға дәріс оқыды.

Ақтөбе облысы бойынша Академия филиалының профессоры Раушан Әкімгерейқызы Есберген «ЖОБАДАН КЕЙІНГІ ҚЫЗМЕТ» тақырыбында онлайн форматта дәріс өткізді.

2023 жылдың 1 желтоқсанынан бастап Академияның Мемлекеттік саясаттың ұлттық мектебінің директоры лауазымына Талгат Жәрдемқұлұлы Жақиянов тағайындалды.

Талғат Жәрдемқұлұлы Академия ұжымында 2011–2016 жылдар аралығында қызмет етіп, Орталық Азия өңіріндегі этносаралық және конфессияаралық қатынастарды зерттеу орталығының сарапшысы, ғылыми қызметкері, жетекші ғылыми қызметкері болып еңбек еткен.

Ал осы уақытқа дейін Конфессияаралық және өркениетаралық диалогты дамыту жөніндегі Н.Назарбаев орталығы Діни ахуалды талдау және мониторинг департаментінің директоры қызметін атқарған.

Талғат мырза, Академиядағы жаңа қызметіңізге мол табыс, береке тілейміз!  Мемлекеттік саясаттың ұлттық мектебінің деңгейін көтеру жолындағы еңбегіңіз жемісті болсын!

Академия ректоры Ерлан Қуанышұлы Әбіл жұмыс сапарымен Жамбыл облысына барды.

Сапар барысында ректор Жамбыл облысы әкімі аппараты бөлімдерінің және басқарма басшыларының қатысуымен ұйымдастырылған «Жобалық менеджмент – қазіргі заманғы басқару тренді» тақырыбындағы семинарға қатысты. Семинар барысында Ерлан Қуанышұлы Академияда атқарылып жатқан жұмыстар мен жаңашылдықтар туралы баяндады, сондай-ақ мемлекеттік қызметшілердің Академияға магистратура және докторантура бағдарламалары бойынша оқуға түсу талаптарына тоқталды.

Сонымен қатар ректор Жамбыл облысы мәслихатының депутаттарымен кездесті. Кездесу барысында әңгіме депутаттардың біліктілігін арттырудың тәртібі мен маңыздылығы тақырыбында өрбіді.

Кездесуден кейін Ерлан Қуанышұлы Академияның Жамбыл облысы бойынша филиалында мемлекеттік қызметшілерге арнап ашылған ғылыми және қолданбалы ізденістер орталығымен, психология кабинетімен және медиа студиямен танысты. Жамбыл облысының мемлекеттік органдарында қызмет етіп жүрген Академияның әр жылдардағы түлектерімен сұхбаттасты. Медиа студияның жұмысымен танысу барысында Академия ректоры журналистерге сұхбат берді.

Жұмыс сапарының соңында Ерлан Қуанышұлы филилал қызметкерлерімен кездесіп, Академияның алдында тұрған мақсаттары, оларды орындау жолында атқарылып жатқан жұмыстар жайлы айтып, филиал қызметкерлерінің сұрақтарына жауап берді.

Бүгін Академияда Халықаралық ақпараттық технологиялар университетінің өкілдерімен кездесу өтті.

Кездесуге Академия тарапынан Корпоративтік және қаржылық қызмет жөніндегі вице-ректор Ұлан Бекіш, Академиялық қызмет жөніндегі вице-ректор Маргарита Қадырова және қызметкерлер қатысты.

Кездесуде мемлекеттік қызметшілерге арналған бірқатар білім беру бағдарламалары, біліктілікті арттыру семинарларын әзірлеу және енгізу бойынша жоспарлар талқыланды. Сондай-ақ қос дипломды бағдарламалар, тиімді шешім қабылдауға мамандандырылған арнайы модульдер, ақпараттық технологиялар және цифрландыруды назарға ала отыра саясатты әзірлеу дағдыларын арттыру бойынша шаралар қарастырылды.

Бағдарламаларды Сеул ұлттық университетінің (Оңтүстік Корея) Мемлекеттік басқару жоғары мектебімен, сондай-ақ мүдделі мемлекеттік және квазимемлекеттік сектор ұйымдарымен бірлесіп іске асыру жоспарлануда.

Бүгін Академия ректоры Ерлан Қуанышұлы Әбіл ресми іссапармен Қызылорда қаласына барды.

Іссапар барысында ректор Академияның Қызылорда облысы бойынша филиалының ғимаратын аралап, қызметкерлерімен пікір алмасты.

Сондай-ақ Қызылорда облысының әкімі Нұрлыбек Машбекұлы Нәлібаевпен кездесіп, мемлекеттік қызметшілерді қолдау, мемлекеттік қызметтің әлеуетін арттыру шараларын, мемлекеттік қызметшілердің құзыреттіліктерін дамыту, шетелдік тағылымдамаларды ұйымдастыру, өңірлік резерв құру және т.б. мәселелерді талқылады.

Академия ректоры Сыр елінде жас мемлекеттік қызметшілердің «Парасат жолы» облыстық слетіне қатысып, Академияның қызметі, өңірлік резервті қалыптастыру үшін құзыреттерді бағалайтын ассесмент қызметінің қыр-сыры, магистратура және докторантура бағдарламаларына оқуға түсу мәселелері бойынша ақпарат берді. Одан бөлек, мемлекеттік қызмет туралы заңға енгізілген өзгерістер туралы айтты. Слетке қатысқан жас мемлекеттік қызметшілердің сұрақтарына жауап беріп, пікір алмасты.

Іссапар аясында ректор Қызылорда облыстық телеарнасына сұхбат берді.

Бүгін Академия ректоры Ерлан Қуанышұлы Әбіл ресми іссапармен Алматы қаласы мен Алматы облысының орталығы Қонаев қаласына барды.

Іссапар барысында ректор Академияның Алматы қаласы және Алматы облысы бойынша филиалдарының, ҚР Мемлекеттік қызмет істері агенттігінің Алматы қаласы және Алматы облысы бойынша департаменттерінің қызметкерлерімен кездесті.

Кездесу барысында Алматы облысы бойынша филиалының жаңадан тағайындалған директоры Абызбаев Бағдаулет Ермаханұлын таныстырды.

Сондай-ақ Алматы облысының әкімі Марат Елеусізұлы Сұлтанғазиевпен кездесіп,  кәсіби мемлекеттік аппаратты құру және тиімді мемлекеттік қызметшілер корпусын қалыптастыру жолында бірлескен жобаларды іске асыру, мемлекеттік қызметшілердің құзыреттіліктерін дамыту, шетелдік тағылымдамаларды ұйымдастыру, өңірлік резерв құру және т.б. мәселелерді талқылады.

Облыс әкімі аппараты басшысының орынбасары Ляззат Мұқатайқызы Бейсеқұлованың және Мемлекеттік қызмет істері агенттігінің Алматы облысы бойынша департаментінің басшысы Арсен Абзалұлы Жақыповтың қатысуымен облыстың жас мемлекеттік қызметшілерімен және Академия түлектерімен кездесу өткізіп, мемлекеттік қызмет туралы заңға енгізілген өзгерістер туралы айтты. Одан бөлек, Академияның қызметі, магистратура және докторантура бағдарламаларына оқуға түсу мәселелері бойынша ақпарат берді.

Сонымен қатар ректор Академияның Алматы облысы бойынша филиалының ғимаратымен және қызметімен танысты.

Бүгін Академияның Алматы облысы бойынша филиалына жаңа директор тағайындалды. Бақдәулет  Ермаханұлы Абызбаев – техника ғылымдарының және экономика ғылымдарының магистрі. Әр жылдары Алматы темір жол көлігі колледжі директорының жаңа инновациалық технологиялар жөніндегі орынбасары,  М.Тынышбаев атындағы ҚазККА «Алматы көлік колледжі» директорының оқу-өндірістік ісі жөніндегі орынбасары, С.Аманжолов атындағы Шығыс Қазақстан  университетінің әлеуметтік және тәрбие жұмыстары бойынша проректоры болып жұмыс істеген. Осы уақытқа дейін М.Тынышбаев атындағы ҚазККА «Шымкент көлік колледжінің» директоры қызметін атқарған.

Бағдәулет Ермаханұлын Академия ұжымына қосылуымен құттықтаймыз! Алматы облысы филиалының жұмысын дамыту жолында сәттілік тілейміз!

24 қарашада Академияға Қазақстандық стратегиялық зерттеулер институтының директоры Еркін Валитханович Тукумов және директордың орынбасары Алуа Серікқызы Жолдыбалина келді.

Кездесуде ынтымақтастықты одан әрі дамытуға байланысты стратегиялық мәселелер талқыланды. Екі мекеме арасында бірлескен жобаларды, ғылыми конференцияларды өткізу мәселелері, сондай-ақ еліміздегі өзекті тақырыптар бойынша докторлық және магистрлік зерттеулерді ілгерілету үшін бірлесе жұмыс істеу мүмкіндіктері талқыланды. Сондай-ақ Қазақстан Республикасының стратегиялық дамуының өзекті мәселелері бойынша зерттеу жұмыстарына қатысу мәселелері атап өтілді.

Академия мен Қазақстандық стратегиялық зерттеулер институты арасында ынтымақтастық туралы меморандумға 2023 жылғы 9 қазанда қол қойылған болатын. Екі жақты келісімнің мақсаты – бірлесе ғылыми-зерттеу бағдарламалары мен жобаларын жүзеге асыру, зерттеудің өзекті бағыттары бойынша заманауи технологиялар мен әдістерді құру және енгізу саласында тәжірибе алмасу, магистранттар мен докторанттарға ғылыми кеңес беру үшін мамандарды тарту, білім алушыларға ғылыми тағылымдамаларды жүзеге асыру болып табылады.

2023 жылдың 20 қараша күні Академияға Пәкістанның мемлекеттік қызметкерлері қонаққа келді. Кездесуде қонақтар Академия қызметімен, тарихымен танысты. Делегация мүшелерімен кездесуге академиялық қызмет жөніндегі вице-ректор Маргарита Қадырова, ғылыми қызмет жөніндегі вице-ректор Әлия Масалимова қатысты.

Қолданбалы зерттеулер институтының директоры Айгүл Көшербаева «Қазақстандағы мемлекеттік басқару және мемлекеттік қызмет» тақырыбында дәріс өткізді. Шетелдік қонақтар Академия басшылығына қонақжайлылығы үшін алғысын білдірді.

Мемлекеттік басқару академиясымен танысқанда мемлекеттік қызметшілерді оқытатынын білдік. Алдағы уақытта сіздермен байланыста болғымыз келеді. Сіздерге көп рақмет», – деді Afaqi Mian Muhammad Jamil.

10 қарашада Академияда «Даму күні» аясында ҚР Қаржы министрлігінің вице-министрі Ержан Біржановпен «Қазақстан Республикасы қаржы жүйесінің дамуы» тақырыбында кездесу өтті. Шараға Академия ректоры, профессор-оқытушылар құрамы, магистранттар мен докторанттары қатысты.

Өз сөзінде вице-министр қаржы жүйесінің дамуы мен қазіргі таңда атқарылып жатқан жұмыстарға тоқталды. Сонымен қатар спикер  Президентіміздің Жолдауындағы осы саланы реформалау бағытында берген тапсырмаларының қалай жүзеге асырылып жатқаны туралы да аудиторияға толық ақпарат берді. Тыңдаушылар мен оқытушылар тарапынан қойылған сұрақтарға жауап берді.

Академия мен министрлік тарапынан келешекте де мемлекеттік қызметшілердің қаржылық басқару саласындағы біліктілігін арттыру мақсатында осы форматта кездесулерді жалғастырудың өзектілігі айтылды.