Академия
жаңалықтары

НАЗАР АУДАРЫҢЫЗ, КОНКУРС!

Қазақстан Республикасы Президентінің жанындағы Мемлекеттік басқару академиясы мына пәндер бойынша профессор-оқытушылар құрамының бос лауазымдарына орналасуға конкурс жариялайды:

Біліктілік талаптары:

Тілдерді білуі: кәсіби деңгейде мемлекеттік, орыс және мүмкіндігінше ағылшын тілдерін меңгеру.

Конкурсқа қатысқысы келетін тұлғалар мына құжаттарды тапсырады:

1) Академия ректорының атына нысан бойынша өтініш;

2) кадрларды есепке алу жөніндегі жеке іс парағы нысан бойынша немесе түйіндеме;

3) жоғары білімі, академиялық және ғылыми дәрежесі туралы дипломдардың көшірмелері, ғылыми атағы туралы құжат және салыстырып тексеру үшін түпнұсқалары;

4) пән бойынша жобаның презентациясы (электрондық түрде, көлемі 10 слайдтан аспайтын) келесі құрылым бойынша:

• білім беру бағдарламасы шеңберіндегі пәннің атауы мен сипаттамасы;
• пәнді оқыту мақсаты, міндеттері және күтілетін нәтижелері;
• пәнді оқыту әдістері мен құралдары;
• әр дереккөзге қысқаша аңдатпасы бар әдебиеттер тізім.

Конкурсқа қатысушы өзінің білімі, жұмыс тәжірибесі, біліктілігі және т.б. бойынша растаушы құжаттары бар қосымша ақпаратты беруге құқылы.

Конкурсқа құжаттар 2024 жылғы 31 мамыры – 14 маусымы аралығында қабылданады.

«ОПҚ конкурсына» белгісі бар құжаттарды қабылдау мына мекенжай бойынша жүзеге асырылады:

• электрондық пошта бойынша: hr@apa.kz
• пошта арқылы немесе қолма-қол (сағат 09:00 – 18:30): 010000, Астана қ., Абай даңғ. 33а, 705-каб.

Тел.: 8 (7172) 75-32-23,

8-705-289-27-01, 8-702-962-00-49

Құжаттардың тізімі толық ұсынылмаған жағдайда Академия кандидаттың өтінімін қарамауға құқылы.

2024 жылдың 28 мамырында Академия делегациясы Франция Ұлттық мемлекеттік қызмет институтына (INSP) іссапармен барды.

Кездесуде тараптар арасындағы қарым-қатынастардың тарихына шолу жасалып, алдағы уақытта бірлескен бағдарламалар бойынша оқыту, тағылымдамалар ұйымдастыру, академиялық ұтқырлық және қолданбалы зертеу жүргізу аясында сарапшылармен алмасу мүмкіндіктері талқыланды.

Академия делегациясы Қазақстан Республикасының Франция Республикасындағы Төтенше және Өкілетті Елшісі Гүлсара Мерейқызы Арыстанқұлованың қабылдауында болды.

Айта кетейік, Академия және INSP (бұрынғы ЕNA) қарым-қатынастары 1994 жылдан бастау алады. 2014-2015 оқу жылында Академияның 8 магистранты ENA-мен бірлескен қос дипломдық бағдарлама бойынша білім алған болатын.

2024 жылғы 27 мамыр күні Қазақстан Республикасы Президентінің жанындағы Мемлекеттік басқару академиясының ректоры Ерлан Әбіл Брюссель Еркін университеті жанындағы Брюссель дипломатиялық академиясы (BDA/VUB) басшылығымен кездесті.

Кездесуде Брюссель дипломатиялық академиясымен ынтымақтастық мәселесі талқыланды (BDA/VUB). Екіжақты келіссөз барысында тараптар ортақ білім беру бағдарламаларын дайындау және халықаралық қатынастар саласы бойынша зерттеу жобаларын жүзеге асыру туралы келісімге келді.

Іссапар аясында Академия делегациясы Бельгия Корольдігі жанындағы халықаралық қатынастар институтының (EGMONT) және Брюссель дипломатиялық мектебінің басшылығымен (CERIS) кездесулер өткізді. Тараптар халықаралық қатынастар саласының өзекті мәселелері бойынша зерттеулер жүргізуге дайын екенін жеткізді.

Ақпарат үшін:

БЮЮССЕЛЬ ЕРКІН УНИВЕРСИТЕТІ (VUB) – Бельгияның рейтингі жоғары университеті және Академияның стратегиялық серіктесі.

БЕЛЬГИЯ КОРОЛЬДІГІ ЖАНЫНДАҒЫ ХАЛЫҚАРАЛЫҚ ҚАТЫНАСТАР ИНСТИТУТЫ(EGMONT) халықаралық қатынастар саласындағы пәнаралық зерттеулерге мамандандырылған тәуелсіз талдау орталығы болып табылады.

БРЮССЕЛЬ ДИПЛОМАТИЯЛЫҚ МЕКТЕБІ (CERIS) халықаралық қатынастар мен дипломатия саласында білім беру және зерттеу жүргізу бойынша озық тәжірибесімен танымал.

20 мамыр күні Академияда білім беру процесінде мемлекеттік органдар үшін аналитикалық жазбаларды дайындау сапасы мәселелері бойынша эксперттік кездесу өткізілді.

Сараптамалық кезесуге мемлекеттік басқару және мемлекеттік қызмет мәселелері бойынша аналитиктерлі даярлау саласындағы сарапшылар мен практиктер, профессор-оқытушылар құрамы, PA&HRM консорциумының мүшелері, Академияның ғылыми қызметкерлері қатысты.

Сараптамалық кездесуде мемлекеттік басқарудағы проблемалардың шешімдерін әзірлеу, жүргізілетін зерттеулердің қолданбалы сипатын күшейту және нәтижелерді алдағы уақытта мемлекеттік қызметшілердің жұмысында қолдану мүмкіндігі сияқты мәселелер талқыланды. Сонымен қатар Академияның білім беру бағдарламаларының тәжірибеге бағдарлануын арттыру, жүргізіліп жатқан реформаларды ғылыми-талдамалық сүйемелдеу мәселелері қарастырылды.

Қатысушылар аналитикалық жазбалардың түрлері қай мемлекеттік органға немесе саяси институтқа қажет екеніне байланысты болатынын айтып, ортақ пікірге келді.

Академияның Білім беру саясаты орталығының басшысы Гульсара Джунусбекова өз сөзінде жоғары оқу орындары, ғылыми-зерттеу институттары және Мемлекеттік басқару академиясы мемлекеттік басқару мен мемлекеттік қызмет жүйесін жаңғырту үшін ұсынымдары бар талдамалық жазбаларды жіберу арқылы мемлекеттік органдардың жұмысын жақсартуға септігін тигізе алатынына назар аударды.

Қазақстан Республикасы Президенті жанындағы Қазақстандық стратегиялық зерттеулер институтынан шақырылған сарапшы Жолдыбалина Алуа Серікқызы өз тәжірибесімен бөлісті және зерттеу тақырыбы бойынша, адресаты, сипаты мен мазмұны бойынша, сондай-ақ экономиканың барлық салаларының негізгі критерийлері бойынша талдамалық жазбаларды бөлуді ұсынды.

Сараптамалық кездесудің қорытындысы бойынша барлық ұсыныс мемлекеттік органдарға жіберілетін аналитикалық жазбалардың сапасын одан әрі арттыру, жетілдіру үшін ескеріліп, жүйеге келтірілетін болады.

ҚР Мемлекеттік басқару академиясына Корей елінің Адами ресурстарды дамыту ұлттық институтының (National Human Resources Development Institute, NHI) делегациясы келді.

Корей Адами ресурстарды дамыту ұлттық институтының Президенті Ким Чэ-Хван ҚР Мемлекеттік қызмет істері агенттігі өкілдеріне, Академия басшылығы мен қызметкерлеріне «Саясатта жасанды интеллектті пайдалану» тақырыбында презентация жасады.

Презентация барысында мемлекеттік секторда жасанды интеллектті пайдалану мәселелері талқыланды. Талқылау барысында Агенттік, Академия және NHI басшылығы мемлекеттік секторда ЖИ-технологияларын дайындау және оны пайдаланудың маңыздылығын атап өтті. Сондай-ақ кездесуде екі ел арасындағы үздік тәжірибелермен алмасу және халықаралық ынтымақтастықты арттыру мәселелері қарастырылды.

Делегация мүшелері Академия вице-ректорларымен, Адами ресурстарды басқару институтының және Кәсіби даму институтының директорымен кездесіп, ортақ жобалар жүзеге асыру және мемлекеттік қызметшілерге арналған оқытулар ұйымдастыру туралы келіссөздер жүргізді.

Қазақстан мен Біріккен Араб Әмірліктері арасындағы келісім аясында «Kazakhstan Executive Leadership 2024» бағдарламасы бойынша қазақстандық мемлекеттік қызметшілерне арналған оқыту басталды. Оқыту бағдарламасы онлайн форматта басталып, офлайн шаралармен жалғасуда. Офлайн оқытудың 15-17 мамыр аралығында өтетін бірінші кезеңіне БАӘ-ден арнайы делегация келді.

Оқытудың басты мақсаты – екі елдің мемлекеттік органдары өкілдерінің арасындағы байланысты нығайту және тәжірибе алмасу. БАӘ министрлер кабинеті министрінің Бәсекеге қабілеттілік және тәжірибе алмасу мәселелері жөніндегі орынбасары Абдулла Нассер Лута болашақта Қазақстанмен ауқымды жобаларды жүзеге асыруға дайын екенін алға тартты.

«Бүгінде Қазақстан мен БАӘ арасындағы мәдени, экономикалық байланыс нығайып жатыр. Тек ол ғана емес, міне, бүгін мемлекеттік қызметкерлер тәжірибе алмасуда. Ол дегеніміз біз үшін де үлкен мәртебе. Алдағы уақытта ауқымды жобаларды бірлесіп жүзеге асыруға дайынбыз», – деді ол.

ҚР Президентінің жанындағы Мемлекеттік басқару академиясының ректоры Ерлан Әбілдің айтуынша, мемлекеттік қызметшілер оқу барысында өз жобаларын ұсынады.

«Оқуға орталық мемлекеттік органның вице-министрлері, департамент басшылары, Академияның өкілдері қатысып жатыр. Жалпы қатысушылар саны – 33, олар бірнеше топқа бөлінді. Сол топ бойынша өздерінің жобаларын іске асырып жатыр, БАӘ-ден келген мамандармен талқылай отырып, сол жобаларын ортаға ұсынатын болады. Біріккен Араб Әмірлігі – креативті индустрия, технологияны дамыту бойынша ресурстардың аздығына қарамастан өркендеу қарқыны өте жоғары ел. Олардың  тәжірбиесіне сүйеніп, дамып келе жатқан мемлекеттер саны артып келеді. Екі ел бірлесе мемлекеттік қызметкерлерді даярлауда бірнеше бағдарлама ұсынамыз. Оның ішінде саяси мемлекеттік қызметкерлерге стратегиялық жоспарлауды, стратегиялық ойлауды үйрету және көшбасшылық бағдарламалары бар», – деді ректор.

ҚР Цифрлық даму, инновациялар және аэроғарыш өнеркәсібі министрі Жаслан Мәдиев бүгін Ұлттық акселератордың іске қосылатынын жариялады.

«Өзекті проблемалық мәселелерді шешудің 100 күнінде БАӘ-нің жеделдету тәжірибесін зерделей отырып, осы тетікті Ұлттық жобалық кеңседе іске қосуды жөн көрдік. Мемлекеттік органдармен бірлесіп акселерациялау тақырыптары анықталды. Маңызды бағыттардың бірі – Capacity Building (әлеуетті арттыру), оның шеңберінде ҚР Президенті жанындағы Мемлекеттік басқару академиясымен бірлесіп, Мұхаммед бен Рашид мемлекеттік басқару мектебінің Executive Leadership Program бойынша Мемлекеттік органдардың басшыларын оқытамыз. Яғни, БАӘ-не цифрлық вице-министрлерімізді оқытуға жібереміз, олар жасанды интеллектті қолдана отырып, түрлі салалардағы мемлекеттік басқарудың жаңа тәсілдері мен әдістеріне оқытылатын болады», – деп атап өтті министр.

«Kazakhstan Executive Leadership Program 2024» оқыту бағдарламасына қатысушы Халықаралық бағдарламалар орталығы АҚ Басқарма төрағасы Әлия Оспанова жобаның көшбасшылар үшін маңыздылығын атап өтті.

 «Біріккен Араб Әмірлігі 100 күндікпен жұмыс істейді. Жобаның ұстаздары – Араб Әмірлігінің  50-100 жылдық стратегиялық құжаттарын жазған авторлар. Олардың қойған талаптары, көрсетіп жатқан тәжірбиелері бізге өте қызық. Қазақстанның көшбасшылары осы тренингке қатысып, сол озық тәжірибені меңгеруі керек», – деді қатысушы.

ҚР Президентінің жанындағы Мемлекеттік басқару академиясының баспасөз қызметі

2024 жылдың 17 мамыр күні Академияның Мемлекеттік саясаттың ұлттық мектебі магистранттары көшпелі дәріске қатысты. «ҚАЗАҚ МЕМЛЕКЕТТІЛІГІ ТАРИХЫ ЖӘНЕ БАСҚАРУ ЖҮЙЕСІ» тақырыбындағы дәрісті этнограф-ғалым, тарих ғылымдарының докторы, профессор Жамбыл Омарұлы Артықбаев өткізді. Көшпелі дәріс аясында магистранттар Щучинск қаласында орналасқан Қазақстандағы алғашқы жекеменшік мұражаймен, Жамбыл Омарұлының жылдар бойы жинаған еңбегімен танысты.

Этнограф мұражайға қойылған негізгі экспонаттарды екі жыл ішінде жинақтаған. Келушілерге қазақ халқының ұлттық мәдениетін, өзге де ұлттардың салт-дәстүрін көрсететін дүниелерді ұсынады. Ғалым Алтын орда заманының монеталарын, археологиялық қазба жұмыстары кезінде табылған заттарды жинаған. Жамбыл Омарұлы өз сөзінде Ғұн ханшайымы 1929 жылы Шортан өзенінің бойында табылғанын, оның суретін көріп, реставрация жасағанын атап өтті. Мұражайға келушілер өзге ұлт өкілдері қазақтың полихром мәдениетін, қазақ халқының қалалық мәдениетін көрсін деген ниетпен Түркістан отырықшылық мәдениетін қосқанын да айтты. Музейде ел тәуелсіздігіндегі маңызды кезеңдер, ұлттық мәдениетпен қатар Ақмола өлкесіне және Бурабай ауданы тарихына қатысты тың деректер ұсынылған. Мұражайда Көкшетау өңіріне келген туристер үшін, өскелең ұрпақ үшін аймақтың сан ғасырлардан бергі тарихы мен танымы топтастырылады. Музейді этнограф ғалым Жамбыл Артықбаев өз қаражаты есебінен ашты. Бұл – ел тарихындағы алғашқы жеке мұражай. Академия магистранттары жеке мұражайдың алғашқы келушілері болып тарихта қалды.

«Жеке музей ашу туралы ой 2020 жылы келді. Әр жылдары жинаған дүниелерім болды, бірақ негізгі экспонаттарды 2022 жылдан бері жинадым. Министрліктен бұл еліміздегі бірінші жекеменшік музей, ол туралы әлі ереже жоқ дегенде таңғалдым. Мұражайды артымда бір із қалса деген ниетпен ашып отырмын. Мектеп оқушыларына музей жұмысын үйретіп, шәкірт тәрбиелеп жатырмын», – деді тарихшы.

Қазіргі таңда мұражай жанынан «Арт Бурабай» шығармашылық шеберханасы салынып жатыр. Музей ғимараты Щучинск қаласының орталығында Абылай хан көшесі 10 мекенжайында орналасқан.

Академияның 30 жылдық мерейтойы аясында Мемлекеттік саясаттың ұлттық мектебінің директоры Талғат Жақиянов бастаған бір топ магистрант  Экоакцияға қатысты. Магистранттар 8 мамыр – Халықаралық музей күніне орай тарихшы Жамбыл Артықбаевтың жекеменшік музейінің айналасына абаттандыру, тазалау жұмыстарын жүргізді. Тарихшы магистранттарға ризашылығын білдіріп, қолғабыс көрсеткендеріне алғыс айтты.

Экоакция Бурабайда Абылайхан алаңындағы экскурсиямен жалғасын тапты. Демалыс барысында фотосессия ұйымдастырылып, бітіруші топтардың магистранттары сапар әдемі естелікке толы болғанын айтты.

Бүгін Академияның 30 жылдық мерейтойы аясында ұйымдастырылған «Даму күнінде» ҚР Парламенті Сенатының депутаты, ҚР Парламенті Сенатының Әлеуметтік-мәдени даму және ғылым комитетінің төрағасы Нұртөре Жүсіппен  кездесу өтті.

Кездесу барысында спикер «Бірлік пен ынтымақ басты құндылығымыз» тақырыбында дәріс оқып, еліміздегі мемлекеттік реформаларды жүзеге асырудағы бірлік пен ынтымақтың рөлін атап өтті.  Сонымен қатар қазіргі кезде мемлекеттілігімізді дамытудағы мемлекеттік қызметшілердің орны мен рөлі қандай болуы керек екенін айтты. Тыңдаушылар көкейлерінде жүрген сауалдарына тұшымды жауап алды.

Сондай-ақ «Даму күнінде» Астана қаласы мәслихатының төрағасы Ерлан Каналимов Ермекұлы «Жергілікті билік пен мәслихаттың өзара іс-қимылы» тақырыбында дәріс оқыды. Академияның профессорлық-оқытушылық құрамымен және тыңдаушыларымен пікір алмасты.

«3 жылға арналған кешенді даму жоспарлары қабылдануда. 2023 жылы денсаулық сақтау, ТЖ және полиция қызметі салаларын дамыту жоспарлары қабылданды. 2024 жылғы қаңтарда білім, мәдениет және спорт салаларын дамытудың кешенді жоспарлары бекітілуде», – деді Каналимов Ерлан өз сөзінде.

Кездесу барысында Ерлан Ермекұлы мәслихат пен жергілікті биліктің елордамыздағы әртүрлі деңгейдегі мәселелерді бірігіп шешудегі қызметі туралы баяндады.

Академияның 30 жылдық мерейтойы аясында «Даму күнінде» кәсіпкер, ҚР Президенті жанындағы жастар саясаты жөніндегі кеңестің мүшесі Олжас Сүлейменовпен кездесу өтті.

Кәсіпкер «Әлем азаматы» тақырыбында қонақ дәріс оқыды. Мотивациялық кездесуде спикер мемлекеттік қызмет, мемлекет идеология мәселелерінің қазақ әдебиетіндегі ұлы ғұлама тұлғалардың шығармаларында қалай көрініс тапқанын жеткізді. Жастардың дамуына қатысты әңгіме өрбітіп, тәжірбиесімен бөлісті.

Академияның 30 жылдығы аясында 2024 жылдың 5 мамыр күні сағат 11:00-де мерейтойлық Спартакиада өтеді. Академия қызметкерлерін және білім алушыларын спорттық шараға белсенді түрде қатысуға шақырамыз.

Қатысуға шақырылатын командалар:

1. Академияның профессорлық-оқытушылық құрамы мен қызметкерлерінің құрамасы
2. Білім алушылар құрамасы (1 курс)
3. Білім алушылар құрамасы (1 курс) №2
4. Білім алушылар құрамасы (2 курс)
5. Түлектер құрамасы
6. Мемлекеттік қызмет істері агенттігінің құрамасы
7. Филиалдар құрамасы

Әр команда қатысушыларды келесі спорт түрлерінен шығаруы керек: шағын футбол, волейбол, үстел теннисі.

Қатысушыларды регламентпен және жарысқа қатысушының жауапкершілігі туралы қолхатпен танысуын сұраймыз. Спорттық шараға медициналық қызметкерлер қатысады. Қауіпсіздік мақсатында қатысушылардан өздерінің дене шынықтыру дайындығына назар аударуды, медициналық қарсы көрсетілімдердің жоқтығына көз жеткізуді сұраймыз. Жарыс алдында жаттығу арқылы жылынуды назардан тыс қалдырмауды сұраймыз.

Өтінім формасын 2024 жылдың 4 мамыр сағат 14:00-ге дейін толтыру қажет.

Қосымша ақпарат алу үшін: +7 700 168 09 79

Өтетін орны: Ы.Дүкенұлы көшесі 23, Спорт кешені

Бүгін Академияда қазақ халқының тарихы, ұлттық мәдени құндылықтары мен салт-дәстүрін жастарға дәріптеу және насихаттау мақсатында «Зияткер» интеллектуалдар ойынының ІІ кезеңі өтті.

«Зияткер» – қатысушылардың білімі мен тапқырлығын, эрудициясы мен логикалық ойлау қабілетін тексеруге арналған командалық сайыс. Интеллектуалдар сайысына (Басқару институтының «МРР-23 және «МЕ-23» мамандығы магистранттарынан құралған) «Сұңқар» және «Қыран» командалары қатысты.

Сайыс барысында ойыншылар бірлесе отырып, идеяларды ұсына қорғады.  Әртүрлі ұстанымдармен пікір алмасып, белсенді қатысты.  Достық қарым-қатынастарын нығайтып, командалық рух қалыптастырды.

Туған жердің тарихын, рухани құндылықтары мен салт-дәстүрі бойынша қойылған сұрақтарға қарсы топтан артығырақ дұрыс жауап берген  «Сұңқар» тобы финалға шықты.

Іс-шараны Академияның Тілдік құзыреттілікті дамыту кабинеті ұйымдастырды.

29 сәуірде Академияда халықаралық сарапшылармен кездесу өтті.

Спикерлер ретінде Ресей халықтар достығы университетінің Стратегиялық зерттеулер мен болжамдар институтының директоры Егорченков Дмитриймен және саяси ғылымдарының докторы, Ресей ғылым академиясының Әлеуметтік ғылымдар жөніндегі ғылыми ақпарат институтының Таяу және посткеңестік шығыс бөлімінің меңгерушісі Аватков Владимир сөз сөйледі.

Дмитрий Егорченков «Еуразиялық кеңістіктегі мемлекеттердің мәдени симпатиясы» тақырыбын талдады.

Владимир Аватков «Түркия Республикасының «Түркі әлемін құру» контекстіндегі сыртқы саяси басымдықтары» тақырыбында дәріс оқып,  Ресей мен Түркияның оңтүстік Кавказдағы сыртқы саяси бағыты мүдделерінің арақатынасы жайлы айтты.  Қазіргі халықаралық қатынастардағы күштердің жаңа тепе-теңдігін қалыптастырудан туындаған Анкараның сыртқы саясатын әртараптандыру және жандандыру жағдайындағы ресей-түрік қатынастары туралы мәлімет берді.

Аталған іс-шараға ҚР Сыртқы істер министрлігінің, ҚР Ұлттық қорғаныс университетінің қызметкерлері, Академияның профессор-оқытушылар құрамы мен білім алушылары қатысты. Халықаралық сарапшылардың дәрістері тыңдаушылардың қызығушылығын тудырды.

2024 жылдың 26 сәуірінде «Даму күні» аясында Академияда профессорлық-оқытушылық құрамына «Оқу процесінде қолданылатын әдістемелік тәсілдер» тақырыбында кезекті семинар өткізілді. Спикер – Мемлекеттік саясаттың ұлттық мектебі доцентінің м.а. Әлібек Мукашев. Әдістемелік семинар интерактивті әдістерді қолдану тәжірибесімен алмасу, халықаралық тәжірибені пайдалану және оқыту сапасын жақсарту әрі арттыру үшін білім беру процесіне инновациялық технологияларды енгізу мақсатында өткізілді.

Сонымен қатар оқу барысында VR технологияларды пайдалану және ойындарды әзірлеу тәжірбиесі бойынша әдістемелік семинар өтті. Атап айтқанда, қолданбалы экономика, макроэкономика пәндері аясында оларды пайдаланудың ұтымды кейстері ұсынылды. 2021 жылы профессор Раушан Дуламбаева басқарушылық шешімдер қабылданатын нақты экономикалық жағдайларды модельдейтін виртуалды ортаның симуляциясын жасады. Ойынды өткізуге білім алушылар қызығушылық танытып, ұсыныстар мен өзгерістер енгізді. Кездесуде магистранттар, докторанттар және оқытушылар VR көзілдірік технологиясын пайдалана отырып, ойын түрінде экономикалық саясаттың түрлі стратегияларын талқылады, дұрыс шешім қабылдау қажет болатын жағдайға тап болып, олардың салдарын әлеуметтік және экономикалық тұрғыдан бағалауға мүмкіндік алды. Цифрлық технологияларды, атап айтқанда, VR ұпайларын пайдалану арқылы білім алушылар виртуалды кеңістікке саяхаттап, иммерсивті оқу тәжірибесін меңгереді. Сондай-ақ стресстік жағдайда сыни ойлауды, аналитикалық шешім қабылдау дағдыларын дамытуға көмектеседі.

Сондай-ақ «Ұлттық жобалар: сабақ алу және өсу нүктелері» тақырыбында вебинар өтті. Спикерлер: Академияның Қостанай облысы бойынша филиалының аға оқытушысы Акмухамбетова Дарихамен және ҚР Ұлттық экономика министрлігі Стратегиялық талдау және даму департаменті директорының орынбасары Мукашева Асем.

Жалпы адамгершілік қасиеттер пен құндылықтар ұлтқа байланысты болмайды. Жалпы әлемдік қоғамдастық тарихының әртүрлі кезеңдерінде кез келген континентте бірлік, жасампаздық және алға ұмтылу секілді халықтың мақсат-мұраттары оларды әрқашан ең жақсы қасиеттерін дамытуға бағыттап отырған. Мемлекет басшысы 2024 жылғы 25 сәуірде өткен Қазақстан халқы Ассамблеясының ХХХІІІ сессиясында сөйлеген сөзінде қазақстандық қоғамды жаңғыру жолында шоғырландыру және негізгі адамгершілік-мәдени құндылықтарды сақтау және арттыру арқылы жаңа даму кезеңіне сенімді қадам басуы кезінде Қазақстан халқы Ассамблеясы айқындаушы рөл атқаратынын және оның қызметінің маңыздылығын атап өтті. Бүгінгі таңда мемлекет пен қоғамның ауқымды күш-жігері табиғи апаттан зардап шеккен азаматтарға көмек көрсетуге бағытталып отыр. Ел Президенті мен барлық мемлекеттік аппарат халықтың қалыпты жағдайға қайтару үшін барлық шараларды қабылдауда. Мемлекет басшысының үндеуіне ірі бизнес өкілдері назар аударып, зардап шеккен өңірлерді қалпына келтіру үшін қомақты қаражат пен материалдық ресурстар бөлуде. Үкіметтік емес сектор мен Қазақстанның жанашыр тұрғындары да өз көмектерін көрсетуде. Осындай қиын сәтті халқымыздың ең жақсы қасиеттері, атап айтқанда бір-біріне қайғыда қол ұшын созып көмектесу, қолдау, пайдалы болуға деген ниеті айқын көрінді. Менің ойымша, осы ретте көп жылдар бойына ұлттық диалог алаңы және халықтық дипломатия институты ретінде қалыптасқан Ассамблеяның жұмысы айтарлықтай ықпал етті. Ол Қазақстандағы толеранттылық пен қоғамдық келісім негіздерін нығайтуда, «әртүрліліктегі бірлік» қағидатын табысты іске асыруда үлкен рөл атқарады.

Мемлекеттік және жергілікті басқарудың PhD, ҚР Президентінің жанындағы Мемлекеттік басқару академиясы Қолданбалы зерттеулер институты директорының м. а. Ш.Т. Шаяхметова