Page 29 - Диссертация к

1.2 «Халық үніне құлақ асатын мемлекет» және «Good Governance»
концепцияларының негізгі қағидалары мен жүзеге асыру құралдары

Қазақстанда қабылданған «Халық үніне құлақ асатын мемлекет»
концепциясы мемлекеттік басқарудың «Сервистік мемлекет» және «Адамға
бағдарланған мемлекет» модельдерін құруды көздеп, заңнамалық деңгейде
нақты мақсаттармен бекітілген және бұл концепциясының мақсатына қол
жеткізу үшін бірнеше стратегиялық шаралар қарастырылған. Біріншіден,
халықпен өзара әрекеттесу арналары күшейтіп, «Белсенді тыңдау» тетіктері
жетілдіру көзделген. Мемлекеттік органдардың халықпен кері байланысын
жүйелендіру мақсатында, өтініштерді қарау сапасын арттыру үшін «Бір
терезе» және «Бір құжат» қағидалары енгізілу ұсынылған. Бұл, өз кезегінде,
мемлекеттік қызмет көрсету үдерісін жеңілдетіп, азаматтардың уақытын
үнемдеуге мүмкіндік береді. Сонымен қатар, «Е-өтініш» жүйесі арқылы
өтініштердің қаралуын қадағалау механизмі енгізіліп, оның ашықтығы мен
тиімділігін арттыруды мақсат еткен. Қоғамдық бастамаларды қолдау
мақсатында «Е-петиция» жобасы іске қосылып, азаматтардың пікірін ескеру
жүйесі қолға алынды. Мемлекеттік қызметтерді цифрлық форматқа көшіру
мәселесіне ерекше назар аударылып, e-Gov платформасы мен «Смартфондағы
мемлекет» мобильді қосымшасы дамытылуда. Бұл шаралар мемлекеттік
басқаруды заманауи технологиялармен қамтамасыз етуге және халыққа
көрсетілетін қызметтердің сапасын жақсартуға бағытталған. Сонымен қатар,
елдегі азаматтық белсенділікті арттыру мақсатында митингілер туралы
заңнаманы жетілдіру және бейбіт шерулерді ұйымдастыру үшін арнайы
орындар бөлу мәселелері қарастырылған. Әлеуметтік және этникалық топтар

арасындағы тұрақтылықты сақтау үшін де нақты шаралар қолға алыну
көзделген. Жалпы, бұл іс-шаралар мемлекеттік басқарудың ашықтығын
арттыруға, азаматтардың мемлекеттік шешімдерге қатысу мүмкіндіктерін
кеңейтуге және тиімді басқару жүйесін қалыптастыруға бағытталған [79], [80].
Ал «Good Governance» қағидалары әлеуметтік әділеттілікті және
қоғамның прогрессивті дамуын қамтамасыз етудің негізгі құралы бола алады.
«Good Governance» қағидаларын жүйелеу – заманауи мемлекеттік басқарудың
маңызды аспектілерінің бірі. Бұл қағидалар басқарушылық шешімдердің
ашықтығын, есептілігін, заң үстемдігін және азаматтардың басқару үдерісіне
белсенді қатысуын қамтамасыз етуге бағытталған.
Ғылыми әдебиеттерді талдау арқылы «Good Governance»
концепциясының негізгі қағидалары мен жүзеге асыру әдістерін зерделеу
олардың мемлекеттік басқарудағы рөлін тереңірек түсінуге мүмкіндік береді
(кесте 5).

29