Page 71 - Диссертация к

«Ашық Үкімет» порталы келесідей бөлімдерден тұрады: «Ашық
деректер», «Ашық НҚА», «Ашық диалог», «Ашық бюджеттер», сондай-ақ
«Мемлекеттік органдар қызметінің тиімділігін бағалау».
«Ашық деректер» бөлімі - бұл мемлекеттік органдардың деректерін кез
келген азамат үшін, қол жетімді әрі түсінікті формада жеткізуге арналған алаң,
бұл қоғамға ақпарат иеленушілерден сенімді әрі ашық деректерді ыңғайлы
түрде оқуға, оның ішінде қайта пайдалануға алу үшін мүмкіндік береді.
«Ашық НҚА» бөлімі (ашық нормативтік құқықтық актілер) әзірленіп
жатқан заң жобаларын халық арасында талқылауға арналған бірыңғай алаң.
Әрбір азамат өз пікірін айта алады және НҚА әзірлеуге қатыса алады.
«Ашық диалог» бөлімі мемлекеттік органдар мен қоғам арасындағы кері
байланысты қамтамасыз етеді. Ол квазимемлекеттік сектор басшыларының
блог-платформасын, интернет-конференцияларды және «сауалнама» жүйесін
қамтиды. Бұнда азаматтардың ұсыныстары мен шағымдарын қарастыруды
жеделдетіп, мемлекеттік басқаруда ашықтықты арттыруға ықпал етеді.
«Ашық бюджеттер» бөлімі - азаматтардың мемлекеттегі бюджет
қаражаттарының жұмсалуын қоғамдық бақылау арқылы белсенді азаматтық
ұстанымды дамытуға ықпал ету үшін құрылған.
«Мемлекеттік органдар қызметінің тиімділігін бағалау» бөлімі
азаматтар мен Үкімет арасындағы өзара іс-қимылды нығайтуға бағытталған,
бұнда мемлекеттік қызметтің тиімділігін бағалау туралы ақпарат және
аумақтарды дамытудың стратегиялық жоспарлары мен бағдарламаларының
нысаналы индикаторларына қол жеткізу туралы есептер орналастырылады.
Мемлекеттік органдардың ашықтық дәрежесін қамтамасыз ету
мақсатында Қазақстан Республикасының 2015 жылғы 16 қарашадағы № 401-V

«Ақпаратқа қол жеткізу туралы» Заңы қабылданған [205]. Бұл заңның 11-ші
бабында сұраныс бойынша ақпарат беру тәртібі, 12-ші бабында ашық
отырыстарға қолжетімділікті қамтамасыз ету талаптары, 13-ші бабында
орталық атқарушы органдар басшыларының, әкімдердің және ұлттық жоғары
оқу орындары басшыларының есеп беру міндеттері қарастырылған. Сонымен
қатар, 14-ші бапта ақпаратты бұқаралық ақпарат құралдарында жариялау, және
15-ші бапта интернет-ресурстарда орналастыру тәртібі белгіленген. Осы
заңнамалық нормалар мемлекеттік органдар қызметінің ашықтығын арттыруға
және азаматтардың ақпаратқа қол жеткізуін қамтамасыз етуге бағытталған.
Бұл жүйенің бағалануы мен бақылануы ақпаратқа қол жеткізу
саласындағы уәкілетті орган (Ақпарат және қоғамдық даму министрлігі)
облыстар, республикалық маңызы бар қалалар деңгейінде жүргізеді.
Келесі Қазақстан өңірлері бойынша талдау жасалынып 2024 жылға
арналған Ашық үкімет порталында Қазақстан Республикасы Жергілікті
атқарушы органдарға жіберілген азаматтардың өтініштерінің саны мен
қанағаттану дәрежесінің есебі жасалды (кесте 19).

71