Page 159 - Диссертация к

«Халық үніне құлақ асатын мемлекет» концепциясын жетілдірудегі
негізгі ұсыныстардың бірі – халықпен байланыстың интеграцияланған
механизмін құру. Бұл үшін:
1. Қолданыстағы кері байланыс құралдарын біріктіру – барлық
мемлекеттік платформаларды (Ашық үкімет порталын негізге ала
отырып) Open API технологиясы арқылы интеграциялау. Бұл:
- Азаматтар мен мемлекеттік органдар үшін бірыңғай интерфейс құрады.
- Деректерді автоматты өңдеу, статистика мен есептерді алу мүмкіндігін
береді.
- Ашықтық пен инклюзивтілікті арттырады.
2. Тиімділік пен қауіпсіздікті қамтамасыз ету:
- Екі факторлы аутентификация, SSO жүйесі, деректерді стандарттау (ISO
20022).
- Big Data және AI құралдарын пайдаланып, мониторинг пен талдау жүргізу.
Зерттеу барысында «Халық үніне құлақ асатын мемлекет» концепциясын
тиімді жүзеге асырудың құқықтық, институционалдық және технологиялық
негіздері жан-жақты қарастырылды. Ұсынылған модель OpenAPI интеграциясы
арқылы халықты ақпараттандыруды жетілдіруді, азаматтық қоғамды
нығайтуды және «Белсенді азамат» пен «Білім беру» контекстерін дамытуды
көздейді. Бұл механизмдер Қазақстан Республикасының ақпараттық
қауіпсіздігін, ашықтығын және қоғамдық диалог мәдениетін арттыруға
бағытталған бірқатар маңызды нормативтік-құқықтық құжаттарға негізделеді.
Атап айтқанда, 2023 жылғы Ақпараттық доктрина мен «Ақпаратқа қол
жеткізу туралы» заң азаматтардың ақпарат алу құқығын қамтамасыз етіп,
шынайы әрі объективті ақпарат ұсынуға бағытталған стандарттарды белгілейді.

Азаматтық қоғамды дамытудың 2025 жылға дейінгі тұжырымдамасы мен
цифрлық трансформация жөніндегі 2023–2029 жылдарға арналған стратегия
азаматтардың басқару процесіне қатысуын кеңейтуге және цифрлық
сервистерді дамытуға бағытталған.
«Халық үніне құлақ асатын мемлекет» концепциясын іске асыру үшін
мемлекеттік органдар мен серіктестердің бірыңғай экожүйесін қалыптастыру
ұсынылады. Бұл ретте Әділет, Қаржы, Мәдениет және ақпарат, Цифрлық даму
министрліктері, сондай-ақ «Ұлттық ақпараттық технологиялар» АҚ, Astana Hub
және өңірлік әкімдіктердің үйлесімді жұмысы маңызды рөл атқарады.
Осы экожүйе негізінде цифрлық сауаттылықты арттыру, мемлекеттік
қызметтерге қолжетімділікті қамтамасыз ету және қоғамдық бақылау тетіктерін
дамыту жүзеге асады. Зерттеу нәтижесінде жасалған SWOT және SPACE-
талдаулар мемлекеттің стратегиялық даму бағыттарын анықтап, Good
Governance қағидаларына сәйкес тиімді басқару моделін қалыптастыруға негіз
болады.
Осылайша, зерттеу нәтижелері «Халық үніне құлақ асатын мемлекет»
концепциясын іске асыруда тиімді институционалдық және цифрлық
тетіктердің үйлесімін табу арқылы мемлекеттің ашықтығы мен азаматтармен
өзара іс-қимылының сапасын арттыруға ықпал етеді.

159